क्रोएसियालाई पराजित गरेर अर्जेन्टिना विश्वकपको फाइनलमा

गफसफ.com, कतार, 14 दिसम्बर 2022

फिफा विश्वकप फूटबल 2022 को फाइनलमा प्रवेश गर्ने अर्जेन्टिना पहिलो दल बनेको छ। सेमिफाइनल खेलमा क्रोसियालाई ३-० गोल अन्तरले परजित गर्दै अर्जेन्टिना कतार विश्वकपको फाइनलमा पुगेको हो ।

अर्जेन्टिनाको जितमा खेलको ३४औं मिनेटमा लियोनेल मेसीले पेनाल्टीमार्फत गोल गरेका थिए भने जुलियन अल्भारेजले खेलको ३९औं र ६९औं मिनेटमा दोस्रो र तेस्रो गोल गरेका थिए । योसहित अल्भारेजले यस विश्वकपमा कुल ४ गोल गरेका छन् भने कप्ताम लियोनल मेस्सीको मोठ 5 गोल पुगेको छ।

 १९७८ र १९८६ मा विश्वकपको उपाधि जितेको अर्जेन्टिना योसहित  छैटौं पटक विश्वकपको फाइनलमा पुगेको छ । पछिल्लो पटक अर्जेन्टिना २०१४ मा फाइनलमा पुगेको थियो र जर्मनीसँग पराजित भएर उपविजेता बनेको थियो ।

 

योसँगै क्रोसिया यस विश्वकपमा उपाधि दौडबाट बाहिरिएको छ । अब क्रोसियाले तेस्रो स्थानका लागि फ्रान्स र मोरक्कोबीचको पराजित हुने टिमसँग आगामी शनिबार खेल्ने छ ।

 

त्यस्तै अब अर्जेन्टिनाले फाइनलमा फ्रान्स र मोरक्कोबीचको विजेतासँग उपाधिका लागि खेल्ने छ । फाइनल खेल आगामी आइतबार हुदैछ ।

मेसीको नयाँ किर्तिमान

लियोनेल मेसी अर्जेन्टिनाका लागि फिफा विश्वकपमा सबैभन्दा बढी गोल गर्ने खेलाडी बनेका छन् ।

मेसीले क्रोसियाविरुद्धको सेमिफाइनल खेलमा गोल गर्दै विश्वकपमा आफ्नो ११औं गोल गर्दै यस्तो किर्तिमान बनाएका हुन् । साथै मेसीले विश्वकपमा कुल ८ गोल असिस्ट पनि गरेका छन् ।

मेसीले ११औं गोल गर्दै गाब्रियल बाटीसटुटाको रेकर्डलाई पछि छोडेका हुन् । बाटिसटुटाले विश्वकपमा कुल १० गोल गरेका थिए ।

त्यस्तै डिएगो माराडोनाले विश्वकपमा ८ गोल गरेका थिए भने गुइलेर्मो स्टेबाइलले पनि विश्वकपमा ८ गोल गरेका थिए ।

त्यस्तै मेसीले अर्जेन्टिनाको लागि भने योगोलसँगै ९६औं गोल गरेका छन्।